Նորութիւններ
Մեր Առաքելութիւնը
Մեր մասին
1915-ի Հայոց Ցեղասպանութենէն ետք, Ֆրանսա հասան մեծ թիւով հայ գաղթականներ, յատկապէս Փարիզի հարաւ-արեւելեան արուարձանը՝ Ալֆորվիլ։ 1920-ականներէն ի վեր, այս համայնքը ճիգ չէ խնայած պահպանելու իր աւանդութիւնները, լեզուն եւ մշակոյթը՝ դէմ դնելով ձուլումի վտանգին։ 6 Յունուար 1970-ին, հիմնուեցաւ «Ալֆորվիլի Հայկական Մշակոյթի Եւ Արուեստի Տան Ընկերակցութիւն»ը։ Ներկայ կեդրոնը կառուցուեցաւ 1976-ին, շնորհիւ Ալֆորվիլի այդ օրերու քաղաքապետ՝ Ժոզէֆ Ֆրանչէսքիի նեցուկին, եւ երկրորդ մասնաշէնքի բացումը կատարուեցաւ 2005-ին:
Հայ Մշակոյթի Տան ամենօրեայ մարտահրաւէրն է փոխանցել եւ քաջալերել հայկական մշակոյթը Ֆրանսայի, յատկապէս Ալֆորվիլի եւ փարիզեան շրջաններէն ներս։ Տունը կը նպատակադրէ Ֆրանսայի մէջ հայկական մշակոյթի փոխանցում՝ փոքրերուն, պատանիներուն, չափահասներուն եւ մանաւանդ ապագայ սերունդին։
Հայ Մշակոյթի Տունը կեանքով լեցուն վայր մըն է, որ տարբեր սերունդներու միջեւ կը ստեղծէ մշտանորոգ կապ մը եւ այս կը կատարէ աւելի քան 50 տարիէ ի վեր, միշտ նորարար ձեւերով։
Յառաջիկայ 50 տարիներուն համար մեր տեսլականն է ունենալ բարելաւուած կառոյց մը` աւելի յարմարաւէտ պայմաններով, հիւրընկալելու յաջորդ սերունդները եւ մշակելու այլ ծրագիրներ եւ դասընթացքներ եւս։ Կը ձգտինք նաեւ, որ Հայ Մշակոյթի Տունը դառնայ ստեղծագործողներուն նեցուկ հանդիսացող վայր մը, ուր կ՚արտացոլուի հայ մշակոյթը՝ Ֆրանսայի մէջ հայկական մշակոյթը զարգացնելու կամքով տոգորուած մարդոց համար, որոնք պիտի յաջողին զարգացնել զայն դարու նորութիւններով։
Ֆիլիփ Պառաւեան
Ալֆորվիլի Հայ Մշակոյթի Տան ատենապետ
